台語之感慨

其實應該嘛要來定定打一寡仔台語文章，
乾焦會曉講是無夠的。
對親像人香港毋止講爾，擱會曉寫（雖然寫的嘛毋是正確的字），
上重要的是因朋友之間攏會曉用，用來開講。
對台灣大部份的人來講，遮嘛無法度的代誌，
誰叫人的教育自細漢就是學國語的，
台語其實定定卻予當做一種土話按呢對待，
毋關是毋是刁工的，尤其是查某朋友。
我的母語是台語，國語是我去學校才學的，
自細漢我就捌感覺奇怪，是按那學校學的佮厝裡講的攏無仝？
其實我讀國中的時陣，我嘛捌看袂起台語，
感覺彼是一種足倯的話（我嘛捌卻予台灣的"國民教育"洗過腦！）。
這馬我會因為會曉講在地的台語來驕傲，
用台語佮爸母、朋友講是予我感覺上親切的。
我毋是講國語就按那，逐家攏是語言，無應該啥卻予啥看袂起，
我只是無佮意台灣社會的這種氣氛，
教台語看作一種無水準的話！
可惜的是，我無看好後擺台語的未來，
我感覺伊會慢慢無去，因為這馬的少年查某攏無佮意講啊，
自然的，因的囝仔對無可能會擱講，
身為母語的一種，上自然的就是對家己的母親遮學。
希望會曉講台語的朋友，鬥陣來支持家己的母語，袂予伊無去。